Smáhkkaskuvlla: Gullu – bealjitge liikojit borramušas
Borramuššii laktásit máŋggalágan jienat. Oassi jienain muitala málesteamis ja oassi šaddá borrandilis. Gievkkanis gullon niibbi skoalkkas, bánno šnjirran, kásterolla duoldan dahje popcornaid spoahkkin ráhkkanahttet min borramii. Muhtun jienat leat oassi biebmu návddašeamis, ovdamearkan garraláibbi ja keavssaid gáskkesteapmi ruožiha. Guluin áicat skoahčči ja daškes borramušaid ráhkadusa iešvuođaid. Heđemiid ja šattuid gáskkesteamis šaddá smiergin. Jus giddet dárkilit fuomášumi borramuššii laktásan gulluáiccuide, fuobmát jienahutge jienaid.Muhtun vuosttát sáhttet jarrat dahje ruohčat ja juobe juhkamušaid šluppardeami sáhttá gullat. Maiddái biebmosáhka ja borramušas hállan leat borramii gullevaš jienat, mat dieđihit midjiide earret eará borramuššii laktásan miellaguottuin.
Gullu
Gullu šaddá bealljemanahaga siste lean bealljecuocca spahrramis jietnabáruid mielde. Spahrran ovdána bealljecuzzii laktásan bealljedávttiid mielde sisbeallji gulluealániidda, skálžui, gos gullusealat leat. Skálžui boahtán jietnabárru dan siste lean golgosa spahradit ja gullusealaid sirdit dieđu gullunearvva mielde vuoigŋašiidda, gos dat dulkojuvvo jietnan.
Gullui laktásan doaimmat oahppadiibmui
- Gulluspealus skáhpuide dahje lihtiide, main ii oainne čađa, lasihuvvojit earálágan materiálaid, dego hearttaid, makarovnna dahje rivnniid nu, ahte guovtti lihtis lea seammá materiála. Ulbmilin lea lihtiid šluvgimiin ohcat, mat lihtit leat párat. Stuorát mánát sáhttet maiddái smiehttat, mii lihtiin sáhtašii leat. Lihtis vuolgán jitnii váikkuha siste lean borramušávdnasa mearri, nuba páraid gánneha mihtidit álo seammá meari.
- Oahppit sáhttet báddet telefovnnain málesteamis ja borramii laktásan jienaid, maid árvádallat oahppadiimmus ovttas. Molssaevttolaččat jienaid sáhttá buvttadit oahppadiimmus oaidnineastaga duohken. Jienat, maid sáhttá earuhit, šaddet ovdamearkan, go leike čázi dahje riseniid kásterollii, garre dahje fasku rušppi, rahpá limonádaboahtala, suoská garraláibbi dahje suvrrakávrrega, fierru lihti fironiin, leahkku dahje gokčá kásterola lohki, skoabada borramušgálvopakeahta dahje skilaha lihtiid ja boradanneavvuid. Borramušmáilmmi jienat šaddet maiddái ruovttumašiinnain, dego káffe- ja čáhcevuoššiin, mikrosuonjaruvnnas ja galmmihanskáhpes. Lassin málesteapmái, dego uvnna alde steikemii ja vuoššamii, gullá iežas jietnamáilmmis.
- Oahppadiimmuin sáhttá smiehttat nu jidnes mállása go vejolaš. Makkár dat livččii? Maid dalle borašii ja jugašii? Makkár borramis ja juhkamis šaddá eanemus jietna? Barggu beaktilvuohta buorrána, jus mális lea vejolaš ollašuhttit ja báddet. Báddema guldaleami maŋŋá šaddá buorre háleštallan das, leigo jietnamáilbmi miela mielde ja hávski? Naba mo skuvla boradansále hávskesvuođa sáhtašii lasihit?
