Smáhkkaskuvlla: Dovdu – mo borramuš dovdo
Suorpmaiguin sáhttá árvvoštallat láibebihttá linisvuođa dahje skoahčama. Njálmmis áicat leago borramuš smieros vai durddas. Borramuša njálbmedovdu váikkuha olu dasa leago dat miela mielde. Boastto njálbmedovdu, dego dipma garraláibi dahje garra soktanjálggis.
Borramuša ráhkadusiešvuođat juhkkojuvvojit mekánalaš ja geometralaš ja čáhce- ja vuodjasisdollui laktásan iešvuođaide. Mekánalaš iešvuođat, dego garrodat ja darváneapmi govvidit eandalii suoskama áigge šaddan dovdduid. Geometralaš iešvuođaid, dego leago šallat, leatgo čoalttut dahje sárrasat, sáhttá áicat jo oaidnimiin, muhto dat bohtet ovdan maiddái njálmmi guoskandovddu vuođul. Njálbmedovdduin áicat maiddái čáhce- ja vuodjadollui laktásan iešvuođaid, dego leago goikkis, máihlái dahje oljolágan. Dovdoáicamat borramušas nuppástuvvet suoskama, čolgga seahkaneami ja borramuša liegganeami čuovvumuššan njálmmis.
Dihto ovttastusat šaddadit njálmmis ja njunis kemodovdoáicamuša, mii lea ovdamearkan boaldi dahje čoaskudeaddji. Eat smáhke chili boaldima, muhto dovdat dan buollin njálmmis ja njunis. Kemodovoáicamuša dahkan ovttastusat leat earret eará chili kapsiidna, bihppormintta mentol ja anisa anetola. Kemodovdoáicamuš sáhttá maiddái mielddisbuktit gastima ja čalmmiid ganjaldeami.
Dovdu
Dovdoreseptovrrat liikkis áicet guoskkaheami, bákčasa, liekkasvuođa, kemodovdoáicamušaid ja dehkiideamet lihkadeami, sajádaga ja uhcodanfámolašvuođa. Sierra reseptovrrat áicet sierra áicamušaid. Reseptovrii boahtán stimulus oažžu reseptovrra sáddet dieđu nearvvaid mielde vuoigŋašiidda, gos dat dulkojuvvo dovdoáicamuššan. Borramuša áicamii oassálastán reseptovrrat leat suorpmain, baksamiin ja njálmmis. Borramuša njálbmedovdagoahtimis háladettiin oaivvildat njálbmegierragis vásihuvvon áicamušaid. Kemodovdun gohčodat dovdoáicamušaid, maid kemiijalaš ovttastusat dahket njálmmi ja njuni šliiveasis.
Dovdui laktásan barggut oahppadiibmui
- Oahppadiimmus dovdui oahpásmuvadettiin buorre gaskaoapmi lea iskkadanseahkka. Dat sáhttá leat čađačuovgameahttun gákkes- dahje plásttetseahka. Stuorát mánáide seahka sisa bidjat máŋggaid borramuššii laktásan áššiid, dego goike biebmoávdnasiid, boradanneavvuid ja málestandárbašiid, ja mánát iskkadallet, mii borramuššii laktásan ávnnas dahje bierggas seahka siste lea. Unnit mánáide sehkkii bidjet dušše ovtta iskkadallama vullosaš ášši háválassii. Buot mánát besset iskat, mii seahka siste lea ovdalgo muitalit seahka sisdoalu.
- Dovdduin áicojuvvon iešvuođaid govvideami sáhttá oahpahallat iskkadanseahkain nu, ahte oahppi muitala giehta iskkadanseahka siste, mo borramuš dahje dasa laktásan bierggas dovdo, ja earát isket árvidit, mii dat lea.
- Oahppadiimmus sáhttá oahpásmuvvat earálágan borramušgálvvuide ja smiehttat, mo dat dovdojit gieđas ja njálmmis. Ovdamearkan garraláibi lea roava, goikkis, garas ja moallaneaddji. Smiehttat ovttas juoga borramušgálvvu, dego rušppi ollislažžan, bihttán ja faskkohahkan, vuššojuvvon ja njuvdojuvvon hámis. Mo dat dovdo gieđas eará hámiin? Naba njálmmis?
- Kemodovddu sáhttá oahppiiguin áiccalmahttit smáhkemiin bihppormintanjálgáid ja stuorát oahppiiguin maiddái láivves chili.
