Borranbeavddis dehálaš niesttit eallimii
Jeavddalaš málesritma lea eandalii dehálaš mánáide, go sii eai veaje borrat stuorra poršuvnnaid hávil. Dat maiddái geahpeda snoahpuma ja bajásdoallá skuvllalačča virkuivuođa. Vai mánná oačču doarvái ja heivvolaš meari energiija beaivvi mielde lea dehálaš, ahte borrojuvvo doarvái dávjá: ovdal skuvlii vuolgima iđitbihttá ja skuvllas beaivemális, skuvllas dahje ruovttus gaskabihttá skuvlabeaivvi guhkkodaga mielde sihke gaskabeaimális ja eahketbihttá. Skuvllas ja ruovttus fállojuvvon mállásat ja gaskabihtát dorjot nubbi nuppi ja dahket ovttas dearvvašlaš ja dássedettolaš ollisvuođa.
Biebmobajásgeassin ovttasbargguin
Mánáid biebmoválljejumiid stivrejit persovnnalaš lusttut ja birrasa addán málle. Ruovttus ohppojuvvon borranvierut leat ovdasajis dehálaččat máná dearvvašlaš biebmoválljejumiid ja jeavddalaš málesritmma oahppama dáfus. Skuvla doarju dán doaimma skuvlaboradandiliin ja oahppatiimmuid biebmobajásgeassimiin. Ja fas fuolaheaddjiid miehtemielalaš jurddašeapmi skuvlaboradeapmái, positiivvalaš borramušságastallan ja mánáid duvdin skuvlaboradeapmái oassálastimii veahkehit fas skuvla iežas doaimmastis.
Dearvvašvuođa ovddidan válljejumiid geardduheapmi buktá bohtosa
Biebmo- ja dearvvašvuođabajásgeassin álgá jo áramánnávuođas. Rávásmanahki sáhttá leat dearvvašvuođa ovddidanbiebmoválljejumiid ja borranritmma dáfus hástaleaddji áigi. Čielggadeamit čájehit, ahte bajit jahkeluohkáide sirdašuvadettiin mánáid oassálastin skuvlaboradeapmái geahppána. Justa dáid jagiin lea dehálaš, ahte ruovttu doaladupmi skuvlaboradeapmái lea miehtemielalaš ja ahte skuvlamállása buhtten eahpedearvvašlaš gaskabihtáin ii ávžžuhuvvo. Skuvlaboradeapmi ja dan ovddidan máŋggabealat ja dievaslaš borranhárjánumit ovddidit rávásmanahkásačča buresbirgejumi árgabeaivvis.
Iđitbihttá, skuvlamállása, jierpmálaš gaskabihtáid ja gaskabeaimállása mearkkašumi gánneha deattuhit jearggalaččat, vaikke hállan orošii gaskohaga skádjamin bealjehis beljiide. Go nuorra beassá miela moiven jagiid meattá, son gal dábálaččat máhccá dearvvašvuođa ovddidan borranhárjánumiide, go lea ožžon das málle árabut.
Ovttas boradeapmi ja dohkkeheaddji mieldeorrun
Ovttas seammá beavdeguoras mánáiguin borran lea eanet go dušše beare mális. Dat buktá návddašeami ja nanosmuhttá oktiigullevašvuođa bearraša gaskkas, leš mánná man ahkásaš beare.
Ovttas boradeapmi dahká vejolažžan hálešteami ja mielde orruma ovttas máná eavttuiguin. Dalle lea buorre áigi gulaskuddat maiddái skuvlaboradeapmái gullevaš áššiid.
